یوم پاکستان کے سلسلے میں یادگار شہدا پر پروقار تقریب کا انعقاد
ملتان(صبح پا کستان ) یوم پاکستان کے سلسلے میں یادگار شہداء پر ایک سادہ و پروقار تقریب کا انعقاد کیاگیا جس کے مہمان خصوصی کورکمانڈر لیفٹیننٹ جنرل اشفاق ندیم احمد تھے جنہوں نے یادگار شہدا پر سلامی دی اور پھولوں کی چادر چڑھائی۔
یاد گار شہدا پر ہونے والی تقریب سے خطاب کرتے ہوئے کور کمانڈر لیفٹیننٹ جنرل اشفاق ندیم احمد نے کہا کہ ہمارے ملک کواِس وقت بے شمار اندرونی اور بیرونی مقابلوں کا سامنا ہے۔ مگرافواجِ پاکستان اور سیکورٹی کے دیگر ادارے خصوصاََ سول آرمڈ فورسسزاور پولیس کے ساتھ مل کر اپنے فرائض کی ادائیگی میں در پیش تمام خطرات کے خلاف سیسہ پلائی دیوار بن کر کھڑی ہیں اورہر طرح کے ناپاک عزائم ناکام بنا نے کے لیے پر عزم ہیں۔انہوں نے کہا کہ آج یوم پاکستان کی تقریب ضرب عضب کی کامیابی کے مر ہونِ منت ہے جو بہت جلد پایہ تکمیل پہنچ جائے گا۔
آرمی کی مایہ ناز یونٹ کی طرف سے سپیشل ڈرل سکارڈ نے اپنے بہترین فن کا مظاہرہ کرتے ہوئے حاضرین کو اپنے توجہ کا مرکز بنائے رکھا۔یاد گارِ شہدا پر منعقد کی جانے والی اِ س پر رونق تقریب میں پاک آرمی کے آفیسران اور جوانوں کی کثیر تعداد نے شرکت کی۔
