لاہور ۔ کنگ آف کامیڈی امان اللہ خالق حقیقی سے جاملے، وہ گردوں اور پھیپھڑوں کے عارضہ میں مبتلا تھے، 70 سالہ امان اللہ طویل عرصہ سے نجی ہسپتال میں زیر علاج تھے۔
ادھر وزیراعظم نے معروف کامیڈیئن امان اللہ کے انتقال پر گہرے دکھ کا اظہار کیا اور مرحوم کے درجات کی بلندی، لواحقین کے صبر کی دعا کی۔ عمران خان نے کہا مرحوم امان اللہ سٹیج، مزاحیہ اداکاری اور ڈرامہ انڈسٹری کا قیمتی اثاثہ تھے۔
واضح رہے کنگ آف کامیڈی امان اللہ طویل عرصہ دنیا نیوز سے وابستہ رہے، ان کے معروف سٹیج ڈراموں میں شرطیہ مٹھے، بیگم ڈش انٹینا شامل ہیں، امان اللہ نے فلم ون ٹو کا ون اور نامعلوم افراد میں بھی جوہر دکھائے، ان کو 2018 میں پرائیڈ آف پرفارمنس ایوارڈ سے نوازا گیا۔
خیال رہے امان اللہ 1950کو لاہور میں پیدا ہوئے، وہ پاکستانی سٹیج کے ایک مشہور و معروف مزاحیہ اداکار ہیں جو سٹیج کے سب سے پرانے اداکاروں میں سے ایک تھے۔
