واشنگٹن (مانیٹرنگ ڈیسک)امریکی محکمہ دفاع پینٹاگون چیف کی ترجمان ڈانا ڈبلیو وائٹ کا کہنا ہے کہ پاکستان ایک ہی وقت میں دہشت گردی سے متاثرہ ملک اور اس کا اسپانسر ہے جو علاقائی سیکورٹی کے لیے بہت کچھ کرسکتا ہے۔
ا
ایک میڈیا رپورٹ کے مطابق ڈانا ڈبلیو وائٹ نے یہ بات میڈیا بریفنگ کے دوران افغانستان کی جانب سے پاکستان پر ملک میں حملوں میں ملوث ہونے کا الزام عاید کرنے سے متعلق سوال کے جواب میں کہی۔انہوں نے کہا کہ ہمارا خیال ہے کہ علاقائی سیکورٹی سے متعلق پاکستان یقیناًمزید بہت کچھ کر سکتا ہے۔ان کا کہنا تھا کہ افغانستان میں سیکورٹی کے حوالے سے پاکستان یقیناًبہت کچھ کرسکتا ہے، ہم دونوں ممالک کی جانب دیکھ رہے ہیں اور امید کرتے ہیں کہ پاکستان اور افغانستان ہماری مدد کریں گے، کیونکہ دونوں دہشت گردی سے متاثرہ ممالک ہیں اور دونوں نے دہشت گردی کو فروغ بھی دیا ہے۔
ترجمان نے کہا کہ اس لیے ہم پاکستان کی جانب دیکھ رہے ہیں کہ وہ خطے کی سیکورٹی کے لیے مزید مواقع پیدا کرے۔سابق وزیر اعظم نواز شریف کے غیر ریاستی عناصر کے ممبئی حملوں میں مبینہ طور پر ملوث ہونے سے متعلق بیان کے حوالے سے انہوں نے کہا کہ پاکستان کو فیصلے کرنے ہیں اور ہمیں امید ہے کہ وہ خطے کی حفاظت میں ہمارا پارٹنر ہوگا۔واضح رہے کہ پاکستان اور امریکا کے درمیان تعلقات حال ہی میں اس وقت مزید کشیدہ ہوگئے جب امریکا نے پاکستانی سفارتکاروں پر سفری پابندیاں عاید کیں، جس کے جواب میں پاکستان نے بھی امریکی سفارتکاروں پر یہ پابندی عاید کردی۔
پینٹاگون ترجمان کا امریکی سفارتخانے کی یروشلم منتقلی کے باعث غزہ کی پٹی پر فلسطینیوں کے مظاہرے کے دوران اسرائیلی فوج کی فائرنگ سے 62 فلسطینیوں کی ہلاکت کے حوالے سے کہنا تھا کہ اسرائیل کو اپنے دفاع اور اپنی سرحد کے تحفظ کا حق حاصل ہے، جبکہ امریکا صورتحال کی نگرانی کر رہا ہے۔ان کا کہنا تھا کہ ہم تمام صورتحال اور دنیا بھر میں اپنے سفارتخانوں پر گہری نظر رکھنے کا سلسلہ جاری رکھیں گے۔
